Pro sas poesias parte de una vida

A pustis de una die de fadiga,
istracca fortemente sa carena,
in sa notte isteddada e serena
ap'intesu una oghe amiga,

a su populu dande sa novella
chi su poeta Peppe Mutzigone,
su chi sa Idda at semper in visione,
de poesias una regorta bella

cheriat donare cun su coro
a sos chi de poesia sun amantes:
totu cussos chi su sero fin festantes
t’an collìdu in su sinu insoro.

Como narrer podes cun resone
cantu custa Idda l'as amada
e cantu continu l'as ninniàda
cun rimas durches prenas de passione.

As cantadu a Deus e a Maria,
pregad'as sos Santos de su Chelu
pro chi umbra o perunu velu
la brivet de s'insoro cumpanzia.

As cantadu sos sotzios de s'amore,
sa cazza e-i su rispettu 'e s'ambiente,
sos campos de trigu e-i su padente,
sas festas paesanas, su folclore.

As cantadu su rispettu e-i s'amistade,
sos ammentos chi ligan de una vida,
cun d'una mente continu sidida
de caminare in sa veridade.

As cantadu sa vida paesana,
s'eternu cuntrastu cun sos riccos,
de sa pobera zente sos affìccos,
una poetica vigile non vana.

Sigh'a cantare, Peppe, cun talentu
versos chi olen dae sin'in sinu,
e-i s'abba 'e sa poesia in su trainu
fagh'andare cun animu cuntentu.

Sigh'a cantare, Peppe, fin'a cando
es de s'anima forte su respiru
e-i sa roda in s'urtimu ziru
de su tuo andare bies tando.

In Bolotana, triulas de su 2010