A propositu de “MISTERIU”
di
Francesco Sanna

In su tempiu de Apollo unu sapiente
“Connosche a tie matessi” b’iat iscritu,
e Pitagora ispiegat chi s’invitu
a su coro fu’ fattu, no’ a sa mente.

Ca su coro est ligadu intimamente
cun s’Ispiritu, in modu chi ogni ritu
o peraula diventen’ un’inditu
pro connoscher a Deus Onnipotente.

Sa mente, invece narat Agustinu,
pretendet in sa rena de iscavare
unu toffu a che ponnere su mare…

Ispero tiu Remundu siat vicinu,
in su “zassu” chi est como, a su Divinu,
e-i su “Misteriu” potat cuntemplare.

* * * * * * * * *