A S'imbriagone
di Vanna Flore

Zovane imbriagone
su parres chi ti mando
m’est pesu e belenu in sa cussenzia:
Lassa su malu vissiu
de viver ismodau,
solu una vorta
venit sa zoventude
e si la maletrattas
prima si ch’ada a andare.
Si poi a bezzu galu ti ch’accattas
asa a esser carcassa
chin su miduddu istampau.
Imbolau in sas carrelas
canes isortos
t’ana a linghes sos pedes
che laccheddu
prenos de achedu e d’ischivu tanau.
Serenadas de muscones
t’ana a fachies sa corte
in nottes d’afa e de nie
sutta unu lantione
chi ascurtat suggellu
tottu sos segretos tuos.

Pubblicata nella “terza pagina” dell’Unione Sarda del 18 aprile 1980