OCTAVA

Sole in sa cara, & in su coro Luna,
Angelica veleta, e istella errante:
Ses bellissima roda de fortuna,
Infogadu cometa algunu instante;
Tantas ses in amare, & ses nesciuna;
Cale tempus pretiosa, & inconstante:
Che frizza in mustra de oro gyrat horas,
Totu amas, de nesciunu t’inamoras.

Chi ses bella non nego; eo mi declaro:
Bella ses, pero vaga in istimare:
Unu Sole in sa cara ti reparo,
Una Luna in su coro a su variare:
Ses optima ermosura, ja lu naro;
Ma pessima amadora a su tractare:
A totu donas cara, e a nesciunu,
Ca, dende coro a tantos, nè l’hat unu.

Ses bell’Anghela in vista, e in pensamentos,
Ma Serafina fea in sos amores;
Bi hat Anghelos veletas, chi cun ventos
Si l’intenden contrarios, & traitores:
Cun sa cara nos tenes totu attentos,
Cun su coro nos faghes disertores:
Andas, & torras, gyras, & ti mudas,
In sa cara leale, in coro Judas.

Pro sa cara ses astru dominante,
Chi oblígas a t’amare chi ti mirat;
Ma pro su coro ses istella errante,
Chi comparet, isparet, si retirat:
Amabile, & odiosa ad ogn’instante,
Lughe, chi spuntat, fuit, & si gyrat:
Ista nocte su coro das a mie,
E a ateru a s’albescher de su die.

Unu coro sinceru est’immutabile
Che rocca, posta a prova de sos tiros;
Ma tue ancora chi hapas cara amabile,
Has unu coro, chi sempre dat gyros:
Che roda de fortuna ses variabile,
Sempre alternende amores, & suspiros:
Milli coros ispaccias, e una cara,
Rara in bellesa, in inconstantia rara.

No si l’intenden no lughes, e fiamas
In cussa cara amabile, & perfecta;
Ca cun su coro tantu pagu m’amas,
Cantu durat efimeru cometa:
Poverita! t’accendes, & infiamas
Pro ogniunu, consumendeti indiscreta,
Et allumas continu noos amores
Pro s’isfinire in ventu che vapores.

Che femina ses bella, ma variabile,
Una, tantas, nesciuna in istimare:
Che tempus ses pretiosa, & ses mudabile,
Amas, cessas, cominzas pro acabare:
Che frizza in mustra de oro incontentabile
Gyras per horas senza mai parare:
Donosa cara, & coro insubsistente,
Tota amore ad’ogni unu, & tota niente!

O cara senza coro, ite pretendes?
Chi aggradet senz’amore s’ermosura?
T’ingannas: Chi fingida a totu offendes,
Sì sa bellesa parat in pintura:
Troppu chimera est su coro, chi vendes,
Nè a cara corrispondet, nè a figura:
Adío edducas, ermosura rara,
Chi chirco bellu coro, e bella cara.