Isterrida

Maria, canta fama e canta glòria
as tentu in dogni altare beneittu
e cantas lodes ancora ti dana;
pro te in vinti sèculos d’istòria
ana sas menzus pàginas iscrittu
de paradisu immortale sovrana.
Salves tota sa genia umana,
eterna Mama ’e su Santu Messia,
pro su cale penadu as e piantu
da Betlemme a su monte Golgota;
salves sa genia umana tota,
eterna Mama ’e su Santu Messia;
salves tota s’umana genia,
eterna Mama ’e su Messia Santu;
pro su cale penadu as e piantu
da Betlemme a su Golgota monte.
Un’istella no b’at in s’orizonte
chi donet che a Tie lunghe bella;
in s’orizonte no b’at un’istella
chi donet lunghe bella che a Tie.
Sos ànghelos festosos ogni die
innos d’amore divinu t’intonan.

Primu fiore

Sos santos che reina t’incoronan
e ti cantan Osanna totucantos,
diletta fiza ’e Gioachinu e Anna,
isbocciada che rosa in Palestina;
sos santos t’incoronan che reina
e ti cantan Osanna totucantos;
che reina t’incoronan sos santos,
e totucantos ti cantan Osanna,
diletta fiza ’e Gioachinu e Anna,
in Palestina isbocciada che rosa;
de Zuseppe fidele, casta isposa
su modellu de Deus creadore.

Segunda retroga

Maria canta fama e canta glòria
………………………………..
innos t’intonan de divinu amore.

Segundu fiore

Bestida in-d-unu mantu ’e risplendore
a sas altas isferas ses partida
ue dòminas, regnas e imperas
Assunta dae su tou Fizu santu;
bestida ’e risplendore in-d-unu mantu
a sas altas isferas ses partida;
in-d-unu mant’e risplendore estida
partida ses a sas altas isferas;
ue dòminas, regnas e imperas
Assunta dae su santu Fizu tou.
As de su Testamentu bezzu e nou
ca de su chelu as sa gianna abeltu.
Sos autistas a Tie an isceltu
e da’ oe t’invocan ogni die
dagh’in su post’e guida si collocan
cando percurrin istradas e pistas;
a Tie t’an isceltu sos autistas
da’ oe t’invocan ogni die;
sos autistas isceltu an a Tie
e ogni die da’ oe t’invocan;
dagh’in su postu ’e guida si collocan
cando percurrin pistas e istradas;
tra sas festas a Tie dedicadas,
Nurallao, cust’àter’as aggiuntu.
Verginella immortale, in dogni puntu
sias de cumpagnia e sentinella;
in dogni puntu, immortale Verginella,
sias de sentinella e cumpagnia.

Su viaggiante accumpagna in sa via
Beneigas sa idda e sa campagna;
su viaggiant’in sa via accumpagna
sa idda e sa campagna beneigas.

Dispedida

Manda in favore annadas amigas
pro su massaju, artigianu e pastore;
manda annadas amigas in favore
pro su massaju, pastor’e artigianu.
Faghe ch’ognunu a chent’annos sanu
vivat cun sa fortuna sempre in paghe
chi a chent’annos sanu ognunu faghe
chi vivat sempre in paghe e cunfortadu.
Sas domos lis visitas a un’a una
No nde lasses mancunu ismentigadu;
benes a presidente e comitadu
chi organizzadu an custa festa.
Intantu fino sa moda modesta
pedinde iscusa a minores e mannos
chi m’azis ascultadu cun passènzia,
zente laboriosa, sempre onesta,
custa die Maria a sos chent’annos
connoscas in santa residenzia;
prima chi lasse sa tua dimora
cuntent’e m’aer fatu preferènzia
un’ateru saludu azzeta ancora
e bona notte e bona permanènzia!

Nurallao, 20-08-1974