Cheglio essere messatore
de tricos de disizos,
cheglio essere pret'e agliola
pro treulare laore,
chegli'essere suore
pro t'iffunder terr'amata
cando isettas sicca e assata
abbas santas dae chelu.
Cheglio esser punzu 'e lutu
sustantzia eterna e sutzu
de cust'anima in turmentu.
Cheglio essere lepi'aratu
pro t'aberrer dilicatu
e dae su surcu 'e su campu
cheglio naschire vrore
pro ti dare colore.
Dae su campu 'e s'ammentu
cheglio naschire entu
pro isparghere in tottue
su vruschiu 'e su pastore
sa melita 'e sa crapa
oche de brunzu e prata
anima 'e custa ratza.
Coment'arvore isfozitu
siccat, mutu, iv'est naschitu,
cheglio poi pasare e sorvere
intro sas durches intragnas
de sa terra mama mea
sa carena tott'intrea.

(Lodè)