A sos amigos de s'undighina
di Antoni Piras

Como nde so' cuntenta
ca fin'in su duamiza
ap'agatadu amigos e poetas
ch'intenden sa lamenta
de cust'umile fiza
lambrigande cun rimas inchietas.
E mi catzan su sidiu,
c'apo postu mintzidiu,
abberinde 'e sa Musa sas iscetas.
Ma non tenzo pretesa
de aer su postu mezus in sa mesa!

Paris a sorres mias
deo puru so' digna
de istare comente innanti istai
cun ateras poesias,
sas mezus de Sardigna,
(sa "par condicio" nachi cheret gai).
Duncas chie tenet gana,
sena tanta matana,
torret a iscrier comente non mai
e in sardu limbazu,
ca sa poesia l'amos a peazu.

Fatu m'azis onore
e mi bastat asie
po mi dare cunfortu e cunsolu,
po torrare colore
finamentas a mie
comente chie s'intendet tristu e solu.
Como tenzo cumpanzos
chi mi dan sos afranzos
e dae nou torro a leare su 'olu.
Ringratzio de s'azudu!
A totucantos mando unu saludu!

Iscanu, su noe de Santuaine de su 2008