A su coro pone mente.

A su coro pone mente
non lu lasses chentza amore
chi l’intendat su calore
non sun penas solamente.

Si l’iscanzas pro amare
non ses sola e s’as premura,
cun su tempus ses segura
de lu poder agatare,
e cun manu as a tocare
unu mare solamente,
cun s’aera ch’est clemente,
ma si cheres sole e luna,
si la chilcas sa fortuna,
a su coro pone mente.

Ca si cue ti l’intendes
lassa ch’essat pro andare,
che ae potat bolare
cun sa vida chi difendes,
ma s’in intro ti lu prendes
non b’at tempus benidore,
s’allizat ogni fiore
ca de nudda l’alimentas,
ma s’a issu lu cuntentas
non lu lasses chentz’amore.

Como curre a lu giamare
ca dae meda est isetende,
faghe t’idat arrivende
pro ti poder abbratzare,
ogni anneu lassa istare,
pone estires de colore
chi s’ind’idat su lugore
e che rosa fiorida,
amore mustra a sa vida
chi l’intendat su calore.

Como atzendelu su fogu,
puru aberila sa gianna,
as a bider lughe manna
chi ti mustrat custu giogu,
ch’atit paghe e disaogu,
si in amore ses prudente
e sintzera e cunfidente
e in totu sas isfidas
non t’impoltan sas feridas,
non sun penas solamente.

Franco Piga (Romana ‘SS’)
s’13 de maju 2008