A su Deus Focu
di Larentu Pusceddu

Su sero de su focu de sant'Antoni
sa luna prena accrarat
sas domos desertas a s'iscuru
astrintas a pare pro su frittu.

Lampos ruiastrinos
e coronas candidas de fumu
si pesan artas in su chelu
dae sas pratas de totus sa biddas
inue sa zente cun s'avore lutat
azuada dae sa frama e s'abardente.

Fasches de ramasinu birde
e truncos seculares
a raicrinas mortas
a su Deus Focu benin sacrificados
pro aturdire s'ierru
fattu de astràu e de iscuru.

Como comintzat in Barbaza
su carrasecare anticu…
Su mammutone s'adderetat sa bisera,
su Merdule si petenat sas peddes,
su Turpu sa cara tintieddat,
s'Eritaju pessichit zovaneddas,
su Mammutzone si liat su casiddu.

Sas umbras si ponen a ballare
in tundu a sa luche caentosa
cun s'allegria farza de sa festa
chi caratzat sas timorias de sa vida
ca impresse las binchet sa tristura
chi mai ponet velos
pro cuare sas traschias
de s'eternu umanu patimentu.

(3° Premiu - Ossi 1998)