A su poeta sena idda G.G. Contini
di Renzo Rosa

Giuseppe Concas nachi t'at rispostu
E tando ti rispondo deo puru
Figura non bi fatto de siguru
Però iscrio ca so conchi tostu

Naran chi a risponder est dovere
Ca gasi si usat in sardigna
Ma cando una domanda no est digna
A bi risponder non ti dat piaghere

Finas sa rima diventat areste
e dogni musa fuit disisperada
si enit una die importunada
da unu chi non s'ischit de in ue este

non drommo pensande a su paisu
de inue sese, e chi t'at mandadu?
Naschidu ses poeta, o as imparadu
Da sa publicidade in calchi avvisu?

Ma deo penso chi cussas quartinas
Chi c'as mandadu a su e Luigi Ladu
Cun trinta munedas t'an pagadu
Apposta po semenare ispinas

puite ca postu ti che ses in mesu
de fattos anzenos sena invitu
in contos chi tue no as diritu
de forrogare si no as cunpresu

e si cun concas semus in cuntierra
sunt cosas chi ischimos nois duos
o Giangiuseppe, non sun fattos tuos!
E non ti bi cherimos in sa gherra

Ca in sa zona 'e su potente 'òe
e de su conte de sas ferrovias
Si atzettan sas veras poesias
Ma no atzettan unu falzu eroe

chi biet sos nuraghes troddulados
Peppones, preigadores pianalzesos
Ainos in sa crescia bene presos
E predis cun nomenes cambiados

Chie biet palittones in casteddu
E corrilentos in sa zona 'e bosa
Siguramente portat calchi cosa
Chi no funzionat intro su chelbeddu

in oggios puru portat calchi abunzu
Ca iet ainos cun sa cara 'e tonca
E in sa boidera chi giuget in conca
Bi sun tottu sas muffas de s'atunzu

Deo iscrio brullettas ma no offendo
Ca gai usain in tempus antigu
No accuto po pungher, su frustigu
E ainos a sa gianna non de prendo

Finas iscriinde fatto su galante
e tottu sos amigos los rispettu
calchi peraula mala a bortas ch'etto
ma solu cun chi creet de esser Dante

e a cussu chi semenat murrunzu
li narzo che amigu "ista attentu
mira chi ses andande contr'a bentu
si tiras pedra e cuas su punzu

puite ca custu mundu est tantu bellu
però si unu saltiat su binariu
est pegus chi andat volontariu
a 'enanti e sa gianna 'e su masellu…

a Luigi sa poesia appo mandadu
po unu chi …no isco 'e cale zona
e si sa rima no est tantu 'ona
li domando de esser perdonadu

e fin' a su poeta crabistone
li mando una forte istrinta 'e manu
deo so Renzo Rosa de iscanu
s'autore de custu minestrone

giovanu non sò ma mancu antigu
e mi piaghet troppu sa poesia
cussu chie tenet sa passione mia
m'est caru che frade, e m'est amigu

però cun chie mi faeddat male
non so che cuddu chi ti dat su asu..
ma pigo a sa punta 'e su parnasu
e de sas rimas.. leo sa istrale!

e mi presento nande"ite cantamos?
sa rima falza o sa rima giusta
posca ti narzo sa manera est custa
e forzis amigos diventamos.

18 settembre 2008