|
A
su poeta signore Peppe Concas
di Renzo Rosa
S'iscrittu caru Peppe est'arrivadu
s'atera die a ora de sas sette
l'appo rezzidu tramite internette
da su caru amigu Luigi Ladu
chi m'at mandadu sos saludos tuos
paris a sos suos personales
faghindemi cumprender cantu ales
e chi semus poetas tottos duos.
M'at fattu veramente piaghere
leggind'a fundu sa poesia tua
sena paraulas malas a sa cua
cun rimas pulidas a dovere
Dae s'arrennegu de su primu impattu
l'apo cumpresu chi non fusti malu
che cussos chi ti ponen a su palu
po aer furadu mossos de recattu
As leadu sa cosa in allegria
e appo sa riposta appreziàdu
ca deo puru mi fu arrennegadu
si m'isti toccadu a bidda mia
ma es gai chi sas musas d'Elicona
comente in su giogu 'e sas frecettas
tiran sa fritza in chilca de poetas
po ier chie faghet rima 'ona
e medas chi sun puntos, pianu pianu
bi provan, sena semenare oltiga
sena offendere e ne ponner briga
lassande sos macchìnes a lontanu
cando, in rima si connoschen bene
si sun in gamba diventan amigos
che sos poetas de tempos antigos
chi an buffadu abba,in s'ippocrene
Poi arrivat su poeteddu nòu
Chi ambos duos los cheret isfidare
hai! Poberittu, sena bi pensare
bettade ch'est su pe subra su tzou
cun versos lanzos postu s'est
in mesu
sena sensu, feos e sbillinos
ilbentiados, bruttos e mischinos
chi mancu una frase, appo cunpresu
mezzus de presse chi alziet sos taccos
ca si solu si provat, a calchiare
devet andare lestru a comporare
quintales de unguentos e impaccos
l'at nadu santu Paule in su vangelu
e Maometto puru in su coranu
chi poeteddos de versu mezzanu
sun ainos chi orrian a su chelu
Ca unu est a fagher rimigheddas
un'atteru est, a inportunare
e chie in suspos bi cheret provare
b'at a lassare, finas sas ungreddas!
deo no offendo, cun sas barzellettas
non tocco, ma non cherzo esser toccadu
e t'assiguro chi chie b'at provadu
n'dat perdidu obilos e giavettas.
penso chi tue puru, sies uguale
ca de sas noe musas ses parente
e non perdones unu prepotente
chi in rimas lanzas ti faeddat male
Como ti domando, ite faghimos!
lu lassamos a perder de su tottu?
o la ponimos s'Elicona in motu
e s'iscureddu in duos lu rispondimos!!
9 .9. 2008
|
