Isterrida

De Buddusò s’amenu altopianu
Vida ti donat o distintu riu
Da’ ue poi aviare ti dese
A firmare in su Golfo d’Oristanu
Ninnende cun su tou mormuriu
Sas provincias sardas totas trese.
Sa vena pius bundante tue sese
Che sambene vitale palpitante
Ca flutuosu in sa zona centrale
Curres de sa Sardigna in sa carena.
Tue pius bundante ses sa vena
Che sambene vitale palpitante
Tue sa vena ses pius bundante
Che palpitante sambene vitale
Ca flutuosu in sa zona centrale
Curres in sa carena ’e sa Sardigna
Inue passas lassende in cunsigna
Una funtana e richesa segura.

Primu fiore

Falas da-e su monte in pianura
Impetuosu ispumante in alas
In su tragitu tou maestosu
Che arcu de onore est dogni ponte.
Falas in pianura da su monte
Impetuosu ispumante in alas
In pianura da su monte falas
In alas ispumante impetuosu
In su tragitu tou maestosu
Est dogni ponte che arcu d’onore
Inue tue che triunfadore
Fieru passas de tanta grandesa.

Segunda retroga

De Buddusò s’amenu altopianu
……………………………….
Una funtana ’e segura richesa.

Segundu fiore

De su Lagu Omodeu in sa distesa
A s’unda jara das ateru impreu
E in sa Diga de Santa Chiara
De s’energia diventas su magu.
In sa distesa ’e s’Omodeu Lagu
A s’unda jara das ateru impreu
In sa distesa ’e su Lagu Omodeu
Ateru impreu das a s’unda jara
E in sa Diga de Santa Chiara
De s’energia su magu diventas
Sas potentes turbinas che alimentas
A cust’Isola intera lughe dana.

Ultima retroga

De Buddusò s’amenu altopianu
……………………………….
De segura richesa una funtana.

Ultimu fiore

A su fiancu ’e sa fadiga umana
In sos canales passas mai istancu
E s’unda tua benefica lassas
Pro ortu pro giardinu e pro ispiga.
A su fiancu ’e s’umana fadiga
In sos canales passas mai istancu
De s’umana fadiga a su fiancu
In sos canales mai istancu passas
E s’unda tua benefica lassas
Pro ortu pro ispiga e pro giardinu.

Chilometros serenos de camminu
Percursos in su tou interu tratu
Chentu chimbanta nd’inserras in sinu
De sos cales ognunu ponet fatu
Da’ ue nasches finas a su mare
Inue t’abandonas soddisfatu
De su ch’as dadu e de su ch’as a dare.
E deo a custu tou mormurare
Oe miscio su meu umile cantu
Pro poder dae coro saludare
Sa Sardigna chi sempre istimo tantu.