1.
A tie, fiza de una terra galana
chi in su coro lassat mannu s’arrastu:
Chelu e mare pasados a contrastu
chircant su monte ch’a palas s’istanat.
A s’albeschida aberis sa ventana
su bentu survat custa meraviza:
finzas a un’omine de mala chiza
bi torrat bischiglia, salude e gana.
2.
Is Adalu chi non giughet puntale
pedrosu in sa badde istremenande
paret, cun s’istrumpus artifiziales
chi abba a Frumendosa sunt furande.
De onzi logu esti fentomada
pro sa natura e sa manna istoria,
de sos nuragicos giuchet memoria
sa Bidda-Manna tua, terra incantada.
3.
S’arrastu t’at lassadu in sa cara
mancai non ti nd’abizzas giaramente,
lara areste, ojada difidente
signus chi dus tenis, non dus imparas.
Paret chi sos arcanos contivizas
chi ischidu as de feminas antigas
e si non l’as ischidu, gai lo ischias
pro un’arrezone chi nemus s’abizzat.
4.
De bona maneras e cun rispetu
de tradissioni sarda como istranza
t’ant pesadu sa bidda, babbu, mama
e sa natura chi fachet segretu
de s’alchimia chi como bestes fiera.
Natura, chi tott’ora t’est amiga
andas a la chircare cando brigas
pro gosire de una paghe sinzera.
5.
A chie l’ischit su tempu c’as pasadu
manitzande, in su buscu, pedralana
a chie l’ischit, cando fis iscolana
sas bortas chi sa saghina as fragadu.
Mi du bisu s’ispantu de pitzinna
chirchende in d’unu arvu mamajolas,
sos ojos a colore de ninzola
bogande lughe de s’arcu a sa ninna.
6.
Isches, custa mirada de pitzinna
colados s’annos non d’as mai perdida
Goso, de cando m’as dadu s’audida
de custa de genuinitade sinna.
Debbadas apo a facher sa pedida
pro ischire si calchicosa ti piaghet:
bellu est pro tie totu su chi si fachet
paret chi custa est s’atera vida.