Ippo gal'a naschire
cantu su virmamentu
it coloridu 'e melodicos cantos.
Rosas in su fozire,
profumavan su ventu
murmurenne pro vois milli vantos.
Ca oje prus de prima
cust'immortale rima,
sa Sardigna la mudat de incantos.
E intro s'elicona,
de laru bos han postu sa corona.
Una die in su Monte
chi bos happo connottu,
de sos versos mi azes faeddadu.
Aennebos devronte,
onorado ippo tottu
galu cheriap'esser ascurtadu.
Est'una sufferenzia,
intro 'e sa cussenzia
sa poesia, vois m'azes nadu.
Sa rima est'un'irfocu
cann'in su coro nos brujat su ocu.
Sa notte mi lu narat su caminu
Custu narrer de tziu Franzischinu.

(Orune 2 ottobre 2002)