Cantu ses bella e cantu maestosa
Cun sos rampos calados fin'a terra,
Ses sa mezus de totta custa Serra
E dogn'annu ti 'estis de isposa.

Ses creschida superba e poderosa
Isfidende su tempus postu in gherra,
E a s'anima mia in cundierra,
Non das paghe! Che mama generosa...

In s'istiu m'has fattu 'e meriagu,
E sutta s'umbra tua frisca e sana,
Cumpostu hapo cantones pro disvagu.

E como sa carena male sana,
Cun su coro de penas imbreagu,
pro ti zibare lagrimas ti dana.