As tue sarda Elena
Trattu de dea,
donosa e dechida
Figura ses amena
De affettu e bellesa
Rosa e giardinu, rara fiorida
Vantos ti los meritas
Adornu de sa domo umbe abitas

Rosa bella e rampu
Senz’attera uguale
Ca s’oju umanu das gaju e recreu
Ses fiore de campu
De su chelu istentale
Brillas che sole in s’universu intreu
Mattutina aurora
Ses de su firmamentu sa segnora

Diana chin Giunone
Ne an’imbija tantu
Ca de sa terra ses unica dea
De timere an rejone
Ca tue das ispantu
Pius de Venus Ciprigna e Citterea
Musas tottu accurride
E coronas de la laru li cinghide

Su visu delicadu
E sas laras vermiglias
Forman de festa quadru lughente
Nemos ne at pintadu
De custas meraviglias
Dae tempus passadu a su presente
Ses su menzus retrattu
Ch’in sa terra e Barbagia bi an fattu

Pro la fagher finida
No mi bastat sa rima
A cantare una dea che a tie
Cherias iscolpida
In eternu imprimida
Pro su candore c’as pius de nie
Ca ses bella e bastante
Cun pilos d’oro che Venus brillante