A UNU PILLONEDDU
ISTRAFFOTENTE

A da lassas, pilloneddu sa ua
Ca non l'amos posta a mesapare
Mancari fettas su cua - cua
Cumpresu appo ca cheres pappare
Seberande sa cotta dae sa crua
Ogni urdone cheres lusinzare
T'avicinas, timorosu bastante
Ma de amie pares incurante.

Mere ses de s'aera e sa nue
E ti allontanas lestramente
Andas, buffas e torras a igue
Dimustrandodi puru insolente
Ista attentu ca in trapula rue
Si continuas a esser repente
Allontanadi, abbandona s'oriolu
Si no che lassas incue su corzolu.

De su perigulu pagu t'incuras
Ca ti la fuis subitu a bolu
Non 'abizzas ca a s'omine furas
E ca non appartenet a tie solu
Ma si pappande ancora t'aduras
Zeo ti preparo unu cordiolu
A mazza piena abbarras ligadu
Tottu, po non t'esser controlladu.

Tenes rejone sighi a pappare
Ca tottu est parte de sa natura
Dirittu has puru de l'assazzare
Pro controllare chi siat madura
Ma nessi unu pagu lassand'istare
Ca l'amos abbada cun tanta cura
Si pappas po famene o golosia
De un'urdone solu azzazzadia.

Deligia Salvatore (Su Paulesu) Austu 2003