Istroppiadu t’at fattu sa natura
Ma dotadu de un animu gentile
Ischiavu de unu vicariu vile
Chi, pro dolu, t’at picadu in cura.

Servu devotu e semper ubbidiente
Aches cumpanzia a sas campanas
E sichis sas regulas cristianas
Supra ‘e una turre, allargu dae sa zente.

T’ an trattadu comente unu cane
E mai unu cane at tantu amadu
As suffertu sa vida e triboladu
In cambiu de unu cant ‘e pane.

Sona campanaru, sona sas campanas
Son s’amore tuo, las podes abbratzzare
Son amantes tuas achelas cantare,
Ponelas a ballare sas galanas.

Sonalas si nibat o si proghete
Sonalas si b’at bentu o si b’at sole
Sona chin turmentu e chin amore
Sona pro chie naschit e chie moghete.

Sona puru pro emigrantes e emigradas
E chin allegria a sos chi cherjo bene
Chin passione sona senna pro mene
E pro chie non las an mai sonadas.