Abbrazza s'ispera
di Giovanni Soro

Sa notte azzendet ojos
de ammentu
e fuet sa luna
assustada
e morit
finzas sa 'oghe
cando sas pedras
han' cantigos
de lamentu.
Immèntiga, frade caru,
e abbrazza s'ispera
e mira s'avrèschida
bianca,
infusta de lentore,
chi falat da-e chelu
pro abbojare
riende
sa felizzidade
de sos coros
feridos.

Menzione d'onore al premio di poesia "Giuseppe Calvia" - Mores 1979