(Dedicata a Tonino Rubattu)

E ti che ses andadu zanu zanu
rendiu rendiu settiu mesu ischidu
in cara sas pricas de sentidu
e sa mirada fissa a sas tropeas
de cussa morte ma galu sas ideas
rundan in sa sardigna galu invanu
ti ses fuidu chin medas unores
chi timbran de balente sos valores.

Colat su tempus e pesat in palas
nois semmus sos fizos de passazu
tue in sa sardigna su messazu
lassas sestadu chin sa bon’istima
forzis po custu ti ricamo in rima
custas ottadas chi juchen sas alas
gosi las lezes in su paradisu
fachende dae artu unu surrisu.

Arzillu t’appo istu e tramande
che unu mastru abile e balente
e fisti tue in Bardia presidente
unu pilastru de sa limba sarda
intas’a sa dis’ora a ora tarda
fisti prontu inoche cussizande
son isparinde custos picadores
chi piscàna in sa fide sos valores.

Est veru cada caddu che ronzinu
torrat in custa terra de ispicas
a tramandare tottu sas fatticas
a sos chi ponen’a nou sos passos
s’anima lassat tottu cada zassos
e curret su sudore in su trainu
donzi luche si morit a misura
chin d’unu velu in ojos a cresura.

Tue Rubattu a medas profanos
as regalau un umiltade istrinta
mancu a sa morte si las dada binta
ca sa cultura tua it tessia d’oro
arrumbas un ammentu intro su coro
in sa Sardigna e tottu sos mundanos
arrumbas ricamadu chin sa groria
cando aperin sa pazina‘e s’istoria.