Adiosu bisu incantadu
di Larentu Pusceddu

(Chistionu tra Elena e Annibal)

- Cantu ses bella! / - Peri tue ses incantu.
- Chie esistit, foras de nois? / - Solu s'amore.
- Non prus cadenas. / - Non prus impignos.
- In custu lettu m'ispozo pro mi donare a tie.
- In custu lettu, ca retzire disizo.
- Su surcu est caente.
- Su semen est prontu pro dormire in sa terra.
E cras? /- Cras un'atera die de amore incantadu.
- Semper mi disizas? / - Semper ti disizo.
- Ocros de chelu craru./ - Fritza in su coro, tue.
- In custa terra, non cherz'istare che nue passizera.
- Andamu a inue non si morit.
- A inue no amus a esser su chi semus istados.
- Iscraos de sas timorias. / - Iscraos de s'ipocrisia.
- Inie b'at fantasia. / - Inie b'at solu amore.
- Inie non b'at dolore. / - Inie b'at solu pache.
- Bolamus a cussu locu? / - Che puzones?
- A sa riva deserta? / - Deserta?
- De sa zente chi no est che a nois.
- Amantes finu a sa morte. / - Beni chi bolamus sienda.
- Andamu a inue su coro non connoschet anneu.
- Andamu a su monte prus artu. / - Pro facher su sartiu.
- Pro bolare in su mare. / - Lizeros che prumas.
- Lizeros che alinos d'entu. / - Inie nos amamus.
- Eternos in d'un'abratzu.
- A l'ides cussa zente? / - Si cuat sas birgonzas.
- Oh! Fortzis no est inoche su chi amus chircadu.
- No b'esistit su chelu, in sa terra...
- Nos semus illusos de s'eternidade de s'amore.
- Est mortu su disizu. / - Finida est sa passione.
- Nos isetan sos fizos. / - E sos betzos amores.
- Torramu a sa terra. / - Torramu a su connotu.
- Torramu a sa realidade./ - Adiosu amore bramadu.
- Adiosu bisu incantadu.

(Inedita)