(Lettere dello stemma di Casa d'Austria)
Austriae est imperare orbi universo

1

Austria, malaitta monarchia,
non ti estas de pumas de paone,
pro chi ses miserabile puzone
e de malauguriu un'istria!
Solu pares cumpagna de s'arpia,
chi pudit dogni nazione e terra.
Balla, ite valentia, in custa gherra
a bocchire innozentes criaturas!

2

Est prezisu chi lessas sas alturas,
ue s'abbile vera format nidu.....
Non deves respirare arias puras,
ca troppu carre umana has ingullidu!
S'Italia chi 'nd hat plus suffridu,
ti nde faghet falare a mala gana...
Tando non bies abba de funtana,
si non bruttura e bulazzadu ludu!

3

Ischidada si est Roma a dare aggiudu
A sas fizas chi tenes sutta franca.
Su libberu crudele como tanca
Ei s'Imperadore abbarret mudu!...
Passadu ti est su tempus si has impudu
de fagher penetenzia, maligna,
ca dai Trento finzas a Sardigna,
giurada est sa vinditta naturale!

4

Olvidadi s'iscettru imperiale,
ei sa tua barbara corona!...
In su mundu non ses pius padrona
Ca deves morrer sutta su pugnale.
In Vienna bi semenen su sale
A tales chi no crescat pius erva!....
Tando pagas sas vittimas superva,
senza culpa affungadas in su mare...

5

Ungheria,enzo como a ti ammentare
sas dies tristas de su Barantotto,
obligadu 'è ti fagher ca lu potto
cun ranzigos suspiros lagrimare!
E prite ti ses movida a gherrare,
cando sos tuos cramana vinditta?
Ajostu, lassa cussa malaitta
Ae pettaja, misera Ungheria!

6

Accolla s'ora, ispilila s'istria,
e it'isettas, Bosnia ruina,
impidu faghe con s'Erzegovina
o giama sa latina Romenia!
Umpare bos movide in cumpagnia
ambas sorres, Boemia e Polonia!
Colpade forte senza zirimonia,
si no ruides a unu muntone!

agosto 1915
Austria erit in orbe ultima