Aeras rujas de mare
abbiat su muttu antigu,
prò semenare su trigu
massajos a laurare.

Dag’has s’incunza cumprida,
fattu su fittu ‘e sa linna,
sos boes in s’alapinna,
remuzan proenda e sida.
Pro chi in campuras de vida
aidattone umpare
in sas cussorzas - che pare -,
crescan de crìas sos mantos
e in chelos a ispantos
aeras rujas de mare.

Chittulianu a su friscu
comintzas sas pulisias
de prunitzas e tirìas,
ruos cun su briu aniscu,
pane sutta su suiscu
ismurzas aunz’a figu
brujende a lenu s’intrigu
sutta in cheas de carvone,
massarias e narvone
abbiat su muttu antigu.

A passos in su ‘arvatu
intro sa tula sestada
est a comintzos s’annada
cun atzas e arramatu
giughene s’erpitze fattu
chi iscristat sa terra azigu,
peri su tempus amigu,
sos boes in sas cameddas
e chie sas bertuleddas
a semenare su trigu.

Birdes cunzados e tancas
tottu in bestes de laore,
manzaniles de lentore
isfunan grinas biancas,
a be-i imbegher sas francas
sedes a irranulare
arzolas a bentulare
fintza a su ruju’e su sero,
torren atzudos, ispero,
massajos a laurare.

1° Premio Sezione A - Poesia in Rima (In memoria di Cicito Canu) - XXVII Concorso di Poesia Sarda CREI - ACLI -- Chiaramonti 2015