Canno custa littera as rezzire
det'essere d'unu mortu
in s’ultima dimora sepellidu
inie as a sentire

sos gridos d’iscunfortu
serrados in su coro addoloridu
de piantu in tristura
infunner des cussa sepoltura.

Canno intennes custa amara rima
chi lass'a tie in’oras de dolore
forzis comente a prima
t’as ammentare de su primu amore .

In cuss’ ora de dolu e de anneu
Leghenne custu iscrittu
Si no as coro reu
Su chizzu t’at benner biaittu.

Sono sos sognos e rimas
martirios e affannos
amores e istimas
e su c' appo suffridu in custos annos.

Sono iscrittas a manu
chin coro luttuosu
timenne chi invanu
siat s’ iscrier meu a te penosu.

Ti pedo e m’iscusare
si ti causo male e iscunfortu
non cherzo rinnovare
fertas in coro tou senne mortu.

Ma forte mi arribat una oghe
chi mi repetiti “ caru amicu iscrie”
pro chi restet inoghe
un’ammentu a sos ch' enini unu die

Iscrio, anima a tie
ca forzis tue m'ass’a cumpatire
ca t'’amessi unu die
ses sa sola chi la podet rezzire

A tinn’ammentas de cant’allegria
e tottu sas isperas ?
como solu su cantu e un’istria
mi annunziat sa morte in sas aeras.

Donzi briu onzi giogu mest brivadu
so abbattidu e vintu
solu solu aspettanne in custu istadu
sa morte chi gia in brazzos m’ att’istrintu.

A t’inn’ammentas sas oras cuntentas
sos risittos , sos giocos befulanos
currenne a manos tentas
iffattu de sos campos solianos ?

Zessados son incantos
no appo prus sa forza e i sa ghia
finidos sun vantos
torrada a s’ossu e sa carena mia

No jucco ne alenu e ne ardore,
de cuddu chi cun tecus possedia
a onz’ala dolore
intenno supra sa carena mia.

Chin sos ojos in lettu
sa cara e mama mia isto chirchenne
chi mi nat lastimosa cun affettu
pranta corazzu ti soe isettene.

Canno s’alenu benit a mancare
e s’anima da su corpu ispiccatta bolu
insupra de Orune atta a colare
senza dare e sa morte toccu e dolu.

Solu tue fatale foglina
as a narrere sa mia disaura
assa a contare sa mea mischina
sufferenzia e sola sepoltura

Narali a tottu sos chi connoschia
su dolu sa tristura e i s’anneu
c’appo provadu e chi provaia
solu e lontanu in custu lettu feu

Si calicunu su toccu att’intesu
e dimanata chie est su mortu chie
narali chi est Peppe Montesu
naschidu in custos littos unu die.

Non poto prus sa pinna sullevare
paret chest’ arribbanne sa muttida
si ancora de me t’ass’ammentare
chi nessi custa restete in sa vida.

Deus chi a su munnu
mi as battidu chin mama giovana
de custu siccu funnu
perdona cuddos chi offesu l’ana

2013