Ajò, lassademi istare
Pensamentos chi m"occhides;
Lassademi si cherides
Un'iscuta reposare!...

Forte penetrassione
D'unu barbaru cuntentu,
Est velenosu alimentu
Chi consumit sa persone;
Sa trista immaginassione
Ardet viva in cuntemplare
Cuddu oggettu singulare
Pro chi eo penas pato;
E si rimediu no agato
Ajò, lassadem'istare.

Turbad'est dogni sentidu,
Ripensend'est sa memoria,
De' cudda passada gloria
Cun chic rest'opprimidu,
E tant'afflittu e finidu
Chi sos chi mi connoschides
Pro cadaver mi tenides,
E tantu forte est s'istragu
Ch'isclamo: — Faghide a pagu,
Pensamentos chi m"occhides! —

Tragicu fine dét tenner
Tantu patir'e penare,
Pro forza prestu dét benner
Custa vid'a s'agabbare;
Pius non m'isc'allegrare,
Penas troppu m'affliggides,
Bido ch'impignu faghides
De mi dar un'abbolottu;
Pro chi non morza in su tottu,
Lassademi si cherides.

Deh! trista immaginascione
O pover'animu afflittu!...
Lamentadi poberittu
De suffrire ch'est rejone;
Non perdas s'occasione
Chi tenes de t'isvagare;
Lassa su coro isfogare
Sa pena chi l'agitat tantu,
Forsis podet in piantu
Un'iscuta reposare.

Coro, in ue ses, in ue?...
Daminde relassione,
T'hapo postu istimascione,
Mi nd"enzo a ue ses tue.
In ue l'hap'a chircare
Sa chi amaio tantu?...
Chirco... però, cant'e cantu
Mai la poto incontrare;

Est debbadas preguntare
Inue est s'amadu coro,
In cadenas cale moro
Isto sempre pianghende
A dogn'istante narzende:
Coro, in ue ses? Inue?...

Possibile a tantas penas
Non ti movas, coro ingratu?
Narami ite t'hapo fattu
Chi de me non ti nd'appenas?
Mancu samben in sas venas
Giuto e tue non lu crés.
Ue abitas?... Ue ses?...
S'ispassu meu, su giogu?...
Ue ses?... in cale logu?...
Daminde relassione!...

Invanu sas boghes mias
A su chelu do e giamo
Unu coro amante ch'amo,
Ma no isco inue sias;
Si pato in angustias
Sa causa nd'est s'amore;
Si pato pena e dolore
Sa causa nd'est s'affettu,
Pro chi a tie unic'oggettu
Hapo postu istimascione.

Finis, calmare procura
Tantu penare e patire.
Ue ses dam'a ischire,
Dami notìscia segura;
Forsis mai sa tritura
Mi potat abbandonare!
Senza te non poto istare;
Senza me, ch'istes, non creo,
Bastat de narrer chi eo
Mi nd"enzo a ue ses tue!