Al prode capitano Aurelio Cossu di Chiaramonti
del 46° fanteria
il cui padre, Salvatore, pure capitano
cadde valorosamente combattendo nella battaglia di Adua

1

O fizu de unu babbu chi s'istima
Meritaiat dae ogni amigu,
cuddu ch'est ruttu cun coraggiu antigu
sa die trista de Abba Garima, distinta tia cherrer una rima,
pro ti lu figurare in Abissinia,
in s'ora chi gherrende in prima linia,
gloria eterna hat incontrada e morte.

2

So cuntentu che isse chi sias forte
e chi ti has fattu onore in sas battaglias,
ca de su genitore has sas iscaglias,
e ses currende sa matessi sorte...
Mentovare ti devene in sa Corte,
o razza generosa 'e Zaramonte.....
Altu in faccia a dognunu alza su fronte,
chi no est abba su samben l'ischias!

3

Trunca,prima 'è torrare a sas nadias
Campagnas de Anglona a fagher festa,
a s'abbilastru 'e Vienna ogni testa
che a s'idra ' e Lerna, ca podias,
ind'unu colpu, e no in duas bias,
ca si nono li creschen dae nou,
e ti siat presente babbu tou,
pro azziu, consizu e ausiliu!

4

In sa sacra Zittade ' e su Conziliu
Prego ch'in breve ch'intres triunfante,
e in sa porta si presentet Dante
umpare cun Omero e cun Virgiliu,
e dognunu de issos let s'appiliu
a tesser gloriosa un'epopea,
ca che sezis torrende a sa Cadrea
a Roma, che in prima a cumandare!

5

Cantu deo ti cherzo augurare,
giustu ti ruat chei s'Evangeliu,
ei sas proas tuas, Aureliu,
una oghe divin tet cantare,
ch'aggiausa che ponner in s'altare
sa Dea chi da ora nde fit rutta,
e s'est pius de una vena asciutta
chi nutresit Sardigna a samben ruju?

6

Sos populos si pijen su enuju
pro adorare s'antiga Reina...
Ogni monte, ogni campu, ogni marina
de saettas si avvivet in su buju!
Mai pius in mundu istringat tuju
Italianu barbaru cannau,
e seghet sas cadenas dogn'isciau,
prestende a tottu Italia una lima!

Giuseppe Calvia Mores - aprile 1916