1

O frade, chi ogni orminzu pro s'ispada
E dogn' impreu ti has lassadu in domo,
ti est dovere de partire como
ind'ogn'attaccu a sa vida irada,
ca sa zent''è Sardigna est numenada,
e distinta in tottue pro gherrera!
Su mare ei sa terra ei s'aera,
nde proclaman sa gloria serenos....

2

No hat potidu ider mai anzenos
Canes sa pulpa sua rozigare:
lampados che los hat intro de mare
sos barbaros indignos Saracenos.
Bennidos fin de pienos
Contra sa cristiana nazione;
ma Sardigna cun dentes de leone,
tottu ti los divorat de seguru!

3

E gasi nde hat distruttu atteras puru
de ienas e bestias famidas,
chi contare non potto sas feridas
sas ch' àn rezidu a lughe e a ischiru;
Pro chi su ferru sardu est punti duru
E manizzadu sempre a firma manu,
su Genovesu, su Ladru Pisanu
con s'Ispagnolu han fattu malu ballu

4

Erede, Antoni,e pettus de mettalu,
de tempera proada e resessida,
cun duresa disposta l'has sa vida.
E non che unu fragile cristallu!
Cun rejone ti han fattu marisciallu,
e meritare tes atteros grados,
ca sos Sardos sun naschidos soldados,
cun leppa e cun berrudu, armas antigas

5

Distintu pro valore a mei obligas
A ti offerrer su laru a bona gana,
ca comente pighesti a Col di Lana,
atteras puntas so zertu chi pigas!....
In s'attaccu 'e sas trumas inimigas
Ti parias in s'Ardia currende,
cando fis giovaneddu divertende
in sa festa de Santu Costantinu!

6

S'antigu Imperadore tene in sinu
Su chi est veneradu in logu tou,
e si proas perilogulos de nou,
sempre t'hat a protegger in caminu,
ca pregat pro s'Italia continu
dae s'altare sua sedulesa!...
Est santu chi favorit cust'impresa
E pro dittu hat sa testa incoronada....

Giuseppe Calvia Mores - aprile 1916