ALONES D’IDENTIDADE
Di Lorenzo Brandinu

Arcanos de misteru, pessamentos
paren alones de tempos passados
istorias e limbazos sun restados
in domos de sas janas a s’iscuru
dogni die designan su futuru
ninniande su coro chin sos bentos

ca s’antigu isolanu abitadore
in dogni caminera ogni cuzone
in cada preda serra o calancone
su signu in sos eremos at lassadu
chin sa conica forma fraigadu
tra frinas d’armonia e de dolore

e dogni turre contat un’istoria
pintande de s’autore su retratu
desizosu d’amore e de riscatu
vijones chi modellan su presente
los an lassados cando fit bivente
pro mantenner ativa sa memoria

ca sos mannos e sos projenitores
an carignadu limbazos eternos
chi eredes antigos e modernos
custodin che secreta eredidade
memorias sacras de s’identidade
pro afrancare mannos e minores

tra limbazos e predas de nuraghe
si custodin sas nostras raighinas
chi padentes pianos e pischinas
iscoperin ammentos, camineras
uve prosperan sonnios e isperas
de orgogliosa libertade e paghe

designos e isperantzias est sicuru
pessighin su caminu già traciadu
sos nuraghes si cuvan su passadu
che logos sacros bene custodidos
tramas d’identidade e de sentidos
chi ispiran su presente e su futuru

Secondo premio concorso Aidomaggiore 2021