S’ermosura, su risu e i su trattu,
sos colores, sos pilos chin sas laras,
sa puresa, su briu e i s’affettu,
regirare, dechida, m’àna fattu,
fisséndemi in sa mente sas pius caras
ideas de ti amare, caru oggettu!

S’ermosura, su risu e i su trattu
sos colores, sos pilos chin sas laras,
sa puresa, su briu e i s’affettu.

Pro no lu perder mai tale isettu
pro te s’amore det èssere assai,
pro no lu perder tale isettu mai
t’app’a amare pro cantu duro biu.

S’ermosura, su risu e i su trattu,
sos colores, sos pilos chin sas laras,
s’affettu, sa puresa, e i su briu.

Tue de grassias ses bundante riu,
e ti desizat donzi coro amante,
tue de grassias ses riu bundante
ne nd’incontro eguale in sa bellesa.

S’ermosura, su risu e i su trattu,
sos colores, sos pilos chin sas laras,
su briu, e i s’affettu, sa puresa.

Si gai in sos amores ses cortesa
comente ses brillante in sos colores
si gai ses cortesa in sos amores,
in su coro un’isettu mi preparas.

S’ermosura, su risu e i su trattu,
sa puresa, su briu e i s’affettu,
sos colores, sos pilos chin sas laras.

Chin tegus cessan sas penas amaras,
tottu sos patimentos tue allenas,
chin tegus cessan sas amaras penas,
duncas tantos turmentos leamilos.

S’ermosura, su risu e i su trattu,
sa puresa, su briu e i s’affettu,
sos colores, sas laras chin sos pilos.

Sos ojos risplendentes fissamilos
dende miradas sas pius ardentes,
fissamilos sos ojos risplendentes
ca rinnovare faghes sos amores.

S’ermosura, su risu e i su trattu,
sa puresa, su briu e i s’affettu,
sos pilos chin sas laras, sos colores.

Non sun tantu gentiles sos fiores
cantu ses tue, chi mi às fattu incantu;
non sun gentiles sos fiores tantu
ca tue ses de Venussu retrattu.

Sa puresa, su briu e i s’affettu,
sos colores, sos pilos chin sas laras,
s’ermosura, su risu e i su trattu.

Incantu tale a su coro m’às fattu,
chi pius atter’oggettu no adoro;
incantu tale mi às fattu a su coro
chi non miro pius atteru visu.

Sa puresa, su briu e i s’affettu,
sos colores, sos pilos chin sas laras,
su trattu, s’ermosura e i su risu.

So resortu pro tene e so dezzisu
de semper t’adorare fin’a mortu,
pro tene so dezzisu e so resortu
de cunservare un’amore sicura.

Sa puresa, su briu e i s’affettu,
sos colores, sos pilos chin sas laras,
su risu e i su trattu, s’ermosura.

Àmami, bella, non ti mustres dura
e prìvami su coro de tristura.