Amenta
di Francesco Sanna

Caru Antiogu, a Roberto Bolognesu
de palte mia li naras, po piaghere,
chi so endinde su 'e Amenta si lu cheret
ca mi l'an duas pessones gia pretesu.

Lu endo siat a pilu o siat a pesu
e no pretendo meda, narabilu;
siat a pesu lu endo o siat a pilu
e meda, narabilu, no pretendo;
a pilu o siat a pesu mi lu endo
duos ettaros battoldighi miliones.

Caru Antiogu, a Roberto Bolognesu
de palte mia li naras, po piaghere,
chi so endinde su 'e Amenta si lu cheret
ca mi l'an gia pretesu duas pessones.

Est pretzisu chi luego bi chistiones
ca si issu no est detzisu mi l'intrego;
chi bi chistiones est pretzisu luego
ca mi l'intrego si issu no est detzisu;
chi luego bi chistiones est pretzisu
si ancora 'e comporare tenet gana.

Caru Antiogu, a Roberto Bolognesu
de palte mia li naras, po piaghere,
chi so endinde su 'e Amenta si lu cheret
ca pretesu duas pessones gia mi l'ana.

Mi dispiaghet a dare cussa tana,
ma a lassare sos depidos no faghet;
a dare cussa tana mi dispiaghet,
ma sos depidos no faghet a lassare;
cussa tana mi dispiaghet a la dare,
ma como su destinu est benniu gai.

Caru Antiogu, a Roberto Bolognesu
de palte mia li naras, po piaghere,
chi so endinde su 'e Amenta si lu cheret
ca pretesu duas pessones mi l'an giai.

Sun prontos sos bagaglios azomai
e de medas isbaglios fatto contos;
Sun azomai sos bagaglios prontos
e fatto contos de medas isbaglios;
Prontos azomai sun sos bagaglios,
ispero in ue so ruttu no che ruas.

Caru Antiogu a Roberto Bolognesu
de palte mia li naras, po piaghere,
chi so endinde su 'e Amenta si lu cheret
ca pretesu gia mi l'an pessones duas.

Paret giogu, sas terras mias e tuas
cun su logu der Marras sun unpare;
sas mias terras e tuas, e giogu paret
sun umpare de Marras cun su logu;
sas terras mias e tuas, e paret giogu,
tra issu, tue e deo mancu unu mere.

Caru Antiogu, a Roberto po piaghere…