AMMENTOS

Antonietta, sa telefonada,
chi tue m'hs fattu, gentilmente
pro me che manna da chelu falada.
cantos ammento m'has torradu a mente,
cussa oghe bujiende de Folklore
su calore nde sento immensamente.
Mi c'has torradu a cando minore,
timidu, innozente, cantaia
versoso de affettu e de amore,
de Cubeddu, Pirastru, Antonandria.
de Gavinu e atteros ancora
mastros de sa sarda poesia.
Mi c'has torradu a mesu sa flora,
de aromas, profumos e colores,
ch'in Siligo teniat sa dimora.
Ammento, a s'alveschida sos pastores,
accudende su latte appenas muntu,
e sos massajos cun sos rappadores,
cun su jiu bellu rassu, bene jiuntu,
arende, erpicende, semenende,
su ranu seberadu, mai su puntu.
Amento, sas massajas suighende
sa farina, su pane saboridu,
lotturas e covazzas infurrende.
E su mannale, in carrela occhidu,
abbrusciadu, appicadu e illadadu,
e sas griglias piena de arrustidu.
E a Sant'Andria pro prima istupadu,
su cubone cun su inu novellu,
bucante, coloridu, e profumadu.
E pro sas festas calchi carradellu,
nde faghimis de ua prelibada,
zirone,cannonadu e muscadellu.
Ha! cantu ti penso era passada,
chi che fozza in balia de sos bentos
ses isparida, a ue sese andada?
Cantos dulzes profundos sentimentos
sento in coro, atraessende a bolu
s'innozente caminu 'e sos ammentos.
So accumpagnadu, ma mi sento solu,
in mesu de rosas e fiores,
c'a chie latte hat suttu da cussos amores
atteru latte ni li dat consolu.

Mimmia SORO (OLANDA)