Solu in s'istanzia mia
de sa notte sas oras numerende
semper in malincunia,
su sonnu, chi non benit, invochende
e suspirende ebbia,
a istentu sas làcrimas frenende,
m'incontro, disdicciadu,
chin su coro derruttu e affannadu.

O nottes fortunadas,
nottes de gioia vera e non compresa
a ue sezis dadas?
Boladas bo nde sezis in lestresa!
Prestu sezis passadas
lasséndemi sa mente troppu accesa
de basos deliziosos
e de dulzes istantes affettuosos!

Cuntemplende s'amante,
cun issa faeddende in allegria
e riende ogn'istante
sas nottese tranquillas passaia
e i como distante
dae me s'incontrat sa columba mia
e inoghe resto solu
cuntinu suspirende a disconsolu.

Si t'ammentas sas oras
troppu breves ma puru celestiales,
ahi, troppu ti addoloras
coro, ca ti trapassan sos pugnales
e de cudda chi adoras
podes solu mirare sos signales,
sos signales d'affettu
chi cunservas serrados a su pettu.

Si 'enit su reposu
a sullevare su corpus affrantu,
unu sognu penosu
benit a mi affliggire a dogni tantu
e m'ischido affannosu
mentras bundat in ojos su pïantu
pensende a s'ermosura
chi mi dabat istantes de dulzura.

Eppuru sun fuidas
cussas nottes chi eternas sognaia
e tristas sun bennidas
a ponner custu coro in agunia.
Si aere milli vidas,
ahi, chi totu e mili las daia
pro poder rinnovare
cussas nottes de gioia singulare.

Però totu mi est vanu
e totu mi est inutile s'isettu,
o fiore sovrumanu,
de t'istringher pius a custu pettu
e nàrrerti s'arcanu
limbazu de s'amore e de s'affettu
e i sas parolas caras
frequente baséndeti in sas laras.

Puru, columba, ispero
de poder cussu tempus rinnovare,
forzis su primu sero
de pustis benedittos in s'altare.
Si in custu cunsidero
paret chi mi det banda su penare
e torret s'allegria
de rier in sa tristura, ànima mia!