Ammentu a su gruppu folk
Sas Nugoresas

Columbas messazeras de dultzura,
bolande su manzanu rasu terra,
paigant angustia e cuntierra,
e movent cun zeniosa mesura.

Die annuada bestint de lugura,
franghent su mundu da lamentu ’e gherra,
de s’ issoro manera faghent perra,
in sos bentos de sole sunt friscura.

Isura e laras che lizu in fiore,
ispricande sunt durche serenada,
da sa innida chinta leant colore.

Cando ballant, sa deghile andantzia,
a zente trista e ispoetizada,
torrant sa paghe e i s’ isperantzia.

Giovanni Antioco Mura
Ilartzi, sas Mendulas, su vintibattoro ‘e triulas 2005