Ammentu de Paba
Zuanni Paulu II

Semenande istima e caridade
cun sinu cardiu e prodizosa manu,
iscaldias che sole fitianu,
s’ispoza e afrizida umanidade.

Movidu da lamentu e piedade
lassas limpidas chintas ’e oghianu,
chi amezorent su biver metzanu
in custa terra briva ’e libertade.

Ma sos rajos tuos sighint lughentes,
aporrint pata a sos coros mischinos,
apretziande su patire issoro.

Proite sufferentzia est riu ’e decoro,
chi mudat pro su chelu sos caminos,
iscrariande neuladas mentes.

Giovanni Antioco Mura
Ilartzi, su 10 ’e arbile 2005