A faedhare de amore non so bona,
finzas si prenu ndhe zuto su coro,
pro mama e fizos chi deo adoro.
pro su maridu chi tenzo a costazu,
ch'in bene e in male m'at dadu corazu,
che una reina,ma chena corona.

Mai m'at prenu de oro ne de prata
atidu non m'at matulos de fiores,
ma abacadu m'at penas e dolores,
che meighina fit un'istrint'e manu,
mai fio sola ne a sero ne a manzanu,
si su male punghiat comente un'ata.

In sa vida sol'apo una disizu,
sa salude de tenner bundansiosa,
cun s'istima sunu sa menzus cosa
sa richesa prus manna intr'e sa domo,
zae dae prima ma prus ancora como,
chi vivimos tra males e fastizu.