T'ap'idu, su sero,
passizende a pés iscurtos
in s'oru de su mare:
pratha de chisina
a sa morte de sa die.

Sa luna apena irgantellat
una luche tremulosa
chi ti mudat
in finissima seda,
trasparente tallaranu,

pantuma via
chi lassat in sa tepia rena
orminas minudas e lizeras
chi sas undas cantzellan.

Sa notte, amore de fantasia,
su mare t'at mutidu
cun sa musica d'eternas mareas
a sas fungudas intragnas.

E sa luna s'ispricat
inue tue sorridente
ti ses inabissadu,
amore de fantasia.