Su coro suffrit a bios
est de affannos pienu
no essit in pettus alenu
lagimas ispargo a rios.
2
Dura mi negas amore
a mie non das risposta
ingrata e non disposta
a sas gridas de dolore
mira non fettas errore
ascurta custas supplicas
in laras su risu siccas
curret sumben prus lenu
su coro suffrit a bios
est de affannos pienu.
3
Nudda t’importat de me
pius no as dolu perunu
sas giamas mias non sunu
dolorosas pius pro te
si podes pensalu e cre
chi deo pius m’addoloro
succuttos mi enini a coro
sas lagimas no ana frenu
su coro suffrit a bios
est de affannos pienu.
4
Pius no accatto consolu
vivo a tie chirchenne
crudele a mie ses denne
dispiagheres e dolu
non cantat su rosignolu
sas nues velan s’aera
non torrat sa primavera
a m’infriscare s’alenu
su coro suffrit a bios
est de affannos pienu.
5
Su t’ider de goi accanida
mi cresches de amara pena
succuttat e siccat sa vena
de cust’anima isfinida
non est ridente sa vida
si tue no amas a mie
no mi mantenzas gasie
faghimi torra serenu
su coro suffrit a bios
est de affannos pienu.
6
Sufferente m’addoloro
ti sicco galu a pensare
a tie non potto olvidare
punghes dolente su coro
lassami viu t’imploro
mantenemi in podere tou
de mi amare acche prou
no mi allattes de fele
amami non sia crudele
cessa chin custu velenu
su coro suffrit a bios
est de affannos pienu.
7
Si no mi amas so mortu
pro me est tottu finida
da custu no b'at essida
inoghe finit su tortu
sutterro custu iscunfortu
respiros e alenos renno
affettos e amores prenno
mi los leo a locu anzenu
su coro suffrit a bios
est de affannos pienu.

Santu Gavine 2014