Amore (Amori) Disconnottu
di Franco Maccioni e Ignazio Mudu

T’hap’a chilcare …
in sas carrelas de s’isperànzia
cussas…chi sàrtiana is bisus cuàus
e acàbanta me is ogus fuidòris de sa vida
de cussa vida chi m’atùmbada appenas
e a pustis… curriri cun su ‘entu;

in sas carrelas de s’isperànzia
t’hap’a chilcare…

T’hap’a pònner fattu…
cun sas alas de su tempus
chi sempri làssanta a segus
is diis maladitas cosa mia,
arrius adasiàus de ludu e de prata
chi si pérdinti in su mari
chen’ ‘e làcanas de is arregordus;

cun sas alas de su tempus
t’hap’a pònner fattu…

T’hap’a isettàre…
in d’unu chizone a pìdinu
comenti fait s’ierru po su soli ‘e beranu,
sa notti po sa luxi ‘e su mengianu
e sa dì po sa paxi ‘e sa notti;

in d’unu chizone a pìdinu
t’hap’a isettàre…

T’hap’a agatàre…
intr’ ‘e sos brazzos de s’Eternu
candu is bisus s’hant a sciasciài,
is arrius s’hant a asciutai,
is diis s’hant a curri prus a pari,
e candu, a s’acabu, sa Morti scéti
m’hat a cunzedi ancora
unu biculeddu ‘e vida;

intr’ ‘e sos brazzos de s’Eternu
t’hap’a agatàre…

Poesia in logudorese-campidanese che ha conseguito il 3° Premio al Concorso “A. Piludu” il 1° dicembre 2001 a Scano di Montiferro.