Andan che rundines chirchende
di Vittoria Calzaghe

Extracomunitarios fuende
Approdan'in sa costa italiana
S'isperenzia innoghe postu hana
Cunfortu e tribagliu sun chirchende
Senz'ischire aue sun'andende
Si friman'in sa terra isolana
In custu logu pienu de incantu
Ismentigan tristura e piantu.

Su nidu hana dezisu de fraigare
Una barracca in taula o in ferru
Fuende tottu dae cuss 'inferni
Sa povertade pro allontanare
Lottende e continuende a lottare
Non connoschen' istiu né ierru
Cun dolores e fadigas immensas
Finzamentas cun malas ricumpensas.

Sos soldados pro fagher su dovere
inue bat bisonzu andan lontanu
Agiuan su malaidu e su sanu
De donos bellos tenen su podere
Lu faghen pro passione e dovere
Sempre prontos a sero o manzanu
A debiles pro dare proteziones
Sempre fieros, fortes che leones.

Sas volontarias pro umanidade
Che sas rundines partin'a trumadas
In chirca e ponner paghe ma indebadas
Cun perigulos de ogni calidade
Inie pro offrire caridade
Las hana che puzones ingabbiadas
Però issas non perden s'isperenzia
E torran' a inie cun costanzia.

Sa gherra es cruenta in cussos logos
A ponner paghe sempre sun tentende
E grandes sacrifizios affrontende
In modu chi non sian'a sos solos
Dae ogn'istadu partini sos bolos
Prontamente los suni aggiuende
Giutende volontarios pro consolu
Partin' aereos che rundines a bolu.