Annina

di Benito Saba (2004)

Di piccinnía
l'ammenti
a tilchjuloni
guttígghjani
illu cori siccu spinosu...
Pa' incantu
u rusetu è ucchjendi,
infusu di límpidu lintori...
e fiori tu,
puppusoni di rosa
a intíbitu sbucciatu...
Annina!...
primu amori... a deci anni...
Li pili biundi longhi,
ricciulina,
l'occhj marini
briddenti
illa cara accesa,
barabáttula di branu...
Sgaciata muturra
a la sciuta da la scola,
ridendi,
inn'una inn'una
sutt'a lu scaloni m'ai tragghjatu,
lestra, pinsarosa, m'ai basgiatu...
e a un alenu sei fugghjta!
T'aría datu la 'ita!...

Benito Saba

Questa poesia ha conseguito il 1° Premio al X CUNCURSU DI PUISIA GADDHURESA E COSSA - "LUNGONI" - Sez. PUISIA GADDHURESA - SANTA TERESA GALLURA - 2004