ANTICU ABITADORE
Di Sebastiano Mariani

E a s’iscuricada penso a tie…
anticu abitadore ‘e viddha mea,
de sole una zirada in d’una die
sa vida mea e tua est tottu intrea…
e su tramontu lassenne est a mie
siccu che una camba ‘e iscrarea .

E si su vrore meu hat pacu afficu
Sa raichina tua est funna e bia
Postu hat amore a su terrinu siccu
Sa gana hat in su sidu cumpagnia
Tue de sufferentzia fis riccu
E i cussa ricchesa como est mia.

Babbu de babbos fizu e custa terra
Pac’istoria a tie han dedicadu
E cussa paca contat de una gherra
Ch’has in die naschinne cumintzadu
E po cantu in sa vida ses duradu
Chin s’amore divisu has perra perra.

In sos raros ritrattos hapo vidu
Visos de sufferentzia cumposta
Mi contan de sas grascias chi has pedidu
Chi abarradas son chene risposta
In s’isettu su tempus ti est fughidu
In cussu annare tuo a cana-costa.

Poveru troppu po dare lamenta
Ligadu a su bisonzu is a cadena
Una manu a sa fide haias tenta
S’atera po lenire atera pena
Chin sudore e fatica istenta istenta
Fortzis ca ti pariat pius lena.

E nutridu de dolos e paguras
E nottes chene sonnu has derramadu
Sa bertula ‘e s’irmenticu has prenadu
Canno connottu has malas isventuras
Chin pane tostu e chin pacas dultzuras
Has donzi sacra die cunsacradu.

E non podennelu moltiplicare
Su pane in deche cantos has truncadu
E s’has bidu su poveru arrivare
Ti ses solu de tene ismenticadu
Che puzone chi in su nidu hat dadu
A sos fizos sas alas po volare.

Fis gentile che omine gentile
Ma colavas sa vida che bannidu
Domo, creja e prejone it su cuvile
Semper de libertade haias sidu
Chene tinta has iscrittu in su jannile
“Chie intrat inoche est bene ennìdu”.


E canno in giovanìa inebriadu
D’una bellesa e profumu de rosa
In dulches serenadas has cantadu
Chin sa voche attonada e tenorosa
E cussa rosa chi t’has afranzadu
Istada est tottu vida dulche isposa

E custa terra tua beneitta
Galu torrat a tie a invocare
Muttit su sacru latte a la bagnare
Lacrimas solu bunnat cussa titta
E chircat chie la podet cunfortare
Chene conca restada est sa berrita.

E tue caru anticu abitadore
Chi de sa vida connosches sa trama
In sa pandera tua bi est s’onore
E amore po sa terra has tentu a mama
Mantene tue accesa sa fiama
Fachelu in numen de s’anticu amore

E si torrare non podes in bida
Sa luche tua galu no est morta
Isparghe custu iscuru atera vorta
In cussa luche b’hamus sa guida
Cherjo vider sa patria risorta
Prima ch’hapa sa vida consumida.

SS 27 06 2019