Naschidas apo vidu de su ventu
Jocad’apo ch’in isse in pizinnia
apo sos prados chin sa ghiddighia
abbaticadu iscurtu cuntentu
totu sos astros de su firmamentu
in sas notes de luna che vidia
su sole mi faghiat de corona
sa luna m’auguravat note bona.

De venas ap’intesu su murmutu
e de fiores onzi nuscu issoro
ap’ in sos rios infustu su coro
chi che fiamma pariat allutu
su samben de sos sardos a sucutu
ispartu, apo vidu, e m’addoloro
juco serradu totu in coro meu
che ammentu morinne dat anneu.

Lavores apo vidu semenados
aranne a juvu in sas vidatones
voche melodiosas e cantones
in serenadas de inammorados
ap’intesu essinne isfortunados
ranchidos prantos dae sas prejones
sardos in terra anzenas apo vidu
chene de mamas aere un’ischidu.

Ap’idu a babbu intintu e carbone
sognenne rios montes e pasturas
a mata a terra in tanas iscuras
chi mancu gai binn’at in prejone
in contu d’unu ranchidu bucone
zumpanne mares lacanas crejuras
custos ammentos annanne mi leo
chin issos paris aspetanne arreo.

Aprile 2016