Apollo
di Padre Luca Cubeddu

1.
Apollo, cum sas Musas d'Elicona,
Accudi' pro attitare unu defuntu,
Amaros versos tragicos intona',
Attita' cum boghe trista de altu puntu,
Arpas ed istrumentos tristos sona',
Accorda' pro piangher custu assuntu,
Accorda' cum lamentu repitidu,
Attita e pianghe, coro addoloridu!

2.
Astreu nascher t'hat fattu irregolare,
Aspide ti trapassat cum sa frizza,
Absalon d'infortunios exemplare,
Abel pares afflittu in sa derdizza,
Acquariu s'abba amarga ti det dare,
Argo ojos pro piangher non ferizza,
Apelle si non ti pintat attrividu,
Attita e pianghe, coro addoloridu!

3.
Briareu feroze ed orrorosu,
Barbaru cum rigore t'ha' trattadu!
Basiliscu serpente velenosu,
Bestiale velenu t'hat vomitadu!
Bellona cum su raju furiosu
Brivu t'hat, in dolore sepultadu,
Boa, serpente, brivu de sentidu;
Brama, coro, e suspira addoloridu!

4.
Caronte ti persighit infernale,
Cerberu ti consumit de velenu,
Cainu acutu ferit cum pugnale,
Cupidu de sas frizzas ti lassat pienu,
Coccodrillos t'affligint pius mortale'
Centauros ti persighint senza frenu,
Cagliare già non podes affligidu,
Coro, attita e pianghe addoloridu!

5.
Dragones ti trapassant omizidas,
Dariu t'hat ligadu cum cadenas,
Deifubu ti dat duras feridas
Defundende su samben de sas venas,
Diana ti dat piagas repitidas,
Dedalu in labirintos ti dat penas
Dolorosu in sepulcrum sepultidu,
Dole, coro, e pianghe addoloridu!

6.
Enea no tengesit mala sorte
Elementos fallaces navighende,
Elisa non fatesit dura morte
Extremu cum su fadu battagliende,
Eolu bravu, cum sos bentos forte,
Eternu già ti lassat suspirende,
Exemplu de infelizes ses bessidu;
E gasi pianghe e attita addoloridu!

7.
Fortuna ti persighit adversaria,
Furias t'accomitint infernale’,
Fetonte tue ses, in penas varias,
Filisteu t'apprettat cum pius male,
Folla t'accumpagnat pius contraria
Funestos cum tormèntos disuguale',
Favoniu mai amigu t'hat favoridu
Finidu pianghe, coro addoloridu!

8.
Gratias tentu non has in favore,
Gigantes furibundos sun armados,
Gorgonas infernales cum orrore,
Gherra crudele faghent cungregados,
Girat e ti regirat su dolore
Grave, cum sos lamentos duplicados
Gustos già postu t'hant in olvidu;
Geme e pianghe, coro addoloridu!

9.
Hiria ti consumit pius crudele,
Hercole già ti lassat senz'amparu,
Harpias ti dant ranchidu su vele,
Horrores non ti faltant pro reparu,
Honoriu ti si mustrat infedele,
Horrendu ti cunzedit disamparu
Horrorosa fortuna t'hat sighidu;
Honestu pianghe, coro addoloridu!

10.
Iob pares afflictu cum dolores,
Ionat t'hat postu in tantas tempestades,
Iupiter ti neghesit sos favores,
Iuno ti lassat in calamitades,
Ianu ti negat totu sos amores
Ingratas conoschides sas deitades,
Iesus, pro cura, t'hat pius feridu;
Intende pianghe, coro addoloridu!

11.
Leopardos ti cherent consumire,
Leones ti pretendent agabbare,
Lupos già ti disizant ingullire,
Leten già chircat de t'annegare,
Lamentos de anghelos sepultire,
Lettiga già ti podes preparare,
Lanza crudele in mesu t'hat partidu;
Lamentadi de coro, addoloridu!

12.
Marte, duru, t'affliggit furibundu,
Medea ti persighit cum incantos,
Mercuriu già ti mustrat pius giocundu
Minerva a tie leat sos abbantos
Minotauru t'imbestit iracundu,
Medusa t'atterrorit cum ispantos,
Morte solu ti lassat affliggidu;
Mischinu, pianghe, coro addoloridu!

13.
Narcisu hapesit fadu pius diciosu,
Nisu incontresit sorte pius galante,
Nettunu ti minetat furiosu,
Naufragiu crudele b'has 'ogni istante,
Nerone contr'a tie est 'ogni gosu,
Nisciunu, incontras, veru coro amante,
Nieddu cum gramaglia has resessidu;
Non zesses, pianghe, coro addoloridu!

14.
Oriente non bides de consolu,
Occasu, sempre tenes amarguras,
Orione funestu agatas solu,
Oceanu de penas e disventuras,
Orfeu non ti olvidat in su dolu,
Ordine non teniat sorte dura,
Omnipotente dolu t'hat sighidu;
Orfanu, pianghe, coro addoloridu!

15.
Palla cum dura lanza t'hat passadu,
Pallid'amante t’assistit ingratu,
Parnasu già ti tenet olvidadu,
Palinuro de penas t'est retrattu,
Plutone contr'a tie est airadu,
Pilatu cum sentenzia t'hat isfattu,
Parcas filos orrendos t'han bordidu;
Pianghe, suspira, coro addoloridu!

16.
Quesciadi cum sos chelos, coro afflictu,
Quescias forma, cum ranchidu lamentu,
Querfas solu intonare tristu attitu,
Quirca forsi agatare unu cuntentu,
Quale cum dolos vives, infinitu!
Querra penas duras e turmentu,
Quietu mai in gosos ti ses bidu;
Quesciadi, pianghe, coro addoloridu!

17.
Radamantos sun totos contr'a tie,
Rinoceronte non perdonat, duru,
Ranchidu vele cum lamentos bie,
Rinnovadu in penas ti det tenner puru,
Restas senza calore, frittu nie,
Reposu in sos dolores has seguru,
Replica cum lamentu repitidu,
Respira, pianghe, coro addoloridu!

18.
Saturnu non ti podet consolare,
Sansone non podet isplicare
Sas penas chi ti brivant de sentire,
Sirenas lassant de ti recreare,
Sibillas non ti cherent assistire,
Solu restas de penas opprimidu.
Suspira, pianghe, coro addoloridu!

19.
Tisifone ti spantat de continu,
Tifen t’hat intimadu dura gherra,
Troia ses in lamentos e destinu,
Tormentos no recreas a tie inserra',
Traversas mares, passas pellegrinu,
Terremotos incontras in sa terra,
Tantalu de cuntentu ses sididu,
Tristu pianghe, coro addoloridu!

20.
Ulisse est chi ti cheret opprimire,
Urania non ti donat pius bellesa,
Ugolinu ti cheret suttraire,
Uranu ti si 'oltat cun fieresa,
Uraganu ti solit destruire
Unanime non ti prestant pius difesa,
Unu solu t'hat mai favoridu,
Urla, pianghe, coro addoloridu!

21.
Vulcanu contr'a tie hat fabbricadu
Velenosu su fogu de s'inferru,
Vacuna sos gustos t'hat negadu
Vintu restas de male sempiternu,
Vertunnua sempre falsu t'hat miradu
Venus t'hat causadu fogu eternu,
Vittoria ne palmas has consighidu;
Vintu pianghe, coro addoloridu!

22.
Xirifu turcu trattat de ti dare
Xiropos de velenu pestilente,
Xenoch a tie non podet isplicare,
Xenofonte non bastat eloquente,
Xantippe in sospiros pro t'agualare,
Xantippo in su lamentu penitente,
Xerse pares de penas opprimidu:
Xoropadu ses, coro addoloridu!

23.
Zanzara velenosa a tie hat puntu,
Zelos t'hant consumidu velenosos,
Zona t'hat brujadu in unu puntu,
Zodiacus cum signos orrorosos,
Zeusi ne retrattat custu assuntu
Zeguadu in sos marmaros lustrosos,
Zeffiru mai amigu t'hat assistidu,
Zeladu pianghe, coro addoloridu!

24.
Astros, Signos, Pianetas celestiales
Cherfìde custu coro accumpagnare,
Accudide cum mutos funerales,
Pro chi restat a puntu de ispirare,
Est trapassadu de multos pugnales,
Sa morte solu cheret perdonare
Asteru non lu perdonat fementidu,
Attita, pianghe, coro addoloridu!

25.
Anghelos chi tenide' cumpassione,
A custu coro dade unu cunfortu,
Homines chi patides afflissiones,
Cum lagrimas benide suo accunortu.
Penas t'affliggint senza remissione,
Su samben de sas venas restat mortu,
Ca totu su cunfortu t'est fuidu:
Attita, pianghe, coro addoloridu!