Arbèschia
di Giovanni Piga

Est morinde un’àtteru sole.

Dego non los accatto prus
cuddos versos de sònniu chi boddìo
che burdones de luche
da-e s’argustu ’e capidanne,
cuddos cantos cubaos
in sos pessos meos pizzinnos
ch’innettaban
sos chelos meos ingrisaos.

Los chirco in su laberintu
’e sa mimoria
sichinde unu lucore treme-treme
da-e su coro fughìu
pro dare afficcu a sas pupias meas
imbeladas de tristìa arcana.
Ma
non los accatto prus...

E sichin a rugher sas dies
che isteddos de fortuna in notte crara.
Su coro meu istraccu,
che bentu secottianu
andat sichinde
traghinos d’istajones sinnadas
apittu ’e una ninìa
de cantones d’isteddos
lucorosas de crompìos incantos.

Sos pessamentos meos sichizones
sun gherrande, istasios, in s’aggorru
de su cherbeddu meu chene pasu...

Est morinde un’atteru sole...

E dego,
cobardu, mi nche torro
a pistorjare versos matticrudos
supra s’incudine ’e sas dudas
in su fravile ’e sos turmentos meos
e isetto chi su manzanu
arbescat
chin sa pache ’e su mundu
in labras...

^^^^^^^^^^^^^^^^^^^^^^^^^^^

Alba

Un altro sole si spegne.

Non li ritrovo più
quei versi di sogno che coglievo
come grappoli di luce
dal pergolato settembrino,
quei canti celati
nei miei giovani pensieri
che diradavano
i miei cieli offuscati.

Li cerco nei meandri
della memoria
guidato da una tremula luce
dal cuore fuggita
per dar sollievo ai miei occhi
velati di un’arcana tristezza.
Ma
non li ritrovo più...

Seguitano a morire i giorni
come stelle cadenti in notti chiare.
Il mio cuore procede, stanco
come vento tardivo
inseguendo
torrenti di stagioni segnate,
anelando una blandizia
di canzoni di stelle
ben mature di luce e d’incanti.

I miei pensieri avvizziti
lottano, sfiniti, nel chiuso
dalla mia mente tormentata...

Un altro sole si spegne...

Ed io,
rassegnato, torno
a ripestare versi incompiuti
sull’incudine delle ubbìe
nella fucina dei miei tormenti
aspettando che l’alba
sorga
con la pace
del mondo
sulle labbra...