Sos caddos falan che bentu currenne
Arzana a chelu prughere caente
Ghetan che friza currenne a pennente
Ifatu a unu totu sun ponenne
Tremet sa terra su chelu est mirenne
In totue sa morte est aspetenne
Su samben’ in sas venas est vuddinne
De chie dat onore e l’est pedinne

Nemos at prus de morte cunsidera
Paret s’intennat sa divina giama
Costantinu chin Elena sa mama
Paren volenne in sa caente aera
Mirat a chelu sa prima pandera
Su coro juchet pienu de brama
Su coro sou de sarda zenia
De cudda mai morta balentia

Brujan sos ojos si tancan sa laras
Aghera e prughere forman’una nue
Sichin currenne non miran neddue
Pregan in conca indurin sas caras
Su coro intennes lu muttis e naras
Curre chin mecus annamus totue
Caddos balentes omines de coro
Est de Sardigna sa nadia issoro