AS’A NASCHER ANCORA!

Cheres nascher ancora? Ma in ue

si T’ant brusiadu finas su peddalzu?

No’ T’ant dassadu in su lemenalzu

una pedra ch’est una. E como Tue

cheres nascher ancora, torra igue

in cussas terras oe insambenadas

chi T’ant bidu gherrande, a imboladas,

cun d’una rughe a coddu, a pesa-rue!

Cheres nascher ancora? Ma in ue?

No’ T’an’a dare fascas ne munteddos

a Ti cuare sas carres biancas nidas

ca serbini a istanzare sas feridas

de bighinos e istranzos, iscureddos!

Ne anninnias ne bonos faeddos,

fruschios de balla po T’ingalinare,

fogos de bruvera a Ti cheghentare,

pedras de frunda e …passos fue-fue.

Cheres nascher ancora? Ma in ue?

As’a nascher ancora! In dogni muta!

In sos coros serrados e odiosos,

in sos disizos de sos bisonzosos,

in dogni carre ischeletrida e assuta.

As’a nascher … non solu in cudda grutta…

In dogni manu astrinta e abramida,

in sas criaturas beninde a sa vida

sutta ‘e su chelu cuadu da una nue…

As’a nascher ancora! E in totue!

Antonio Piras (Scano)