Ite t’amus atu de goi male
Chi nos imbias una pandemia
Nara uv’est s’offesa natura mia
Datu chi punnas a nos isterminare

Vortzis sas fabbricas s’issoro abusu
Sas forestas chi nche semus seccanne
O sa terra chi semus iscavanne
Potet esser sa prastica in disusu

Galu s’orrocramentu 'e sas intragnas
Uve custodis su chi t’has cuatu
Cussa luva chi t’amus siringatu
O s’isastragare de sas muntagnas

Insomma donzi cosa a cara tosta
Ata chene grabbu e chene pessare
Anzis pessanne solu a t’irfruttare
Cumbintos chi l’esseres cosa nostra

Educata ti naro non so tua
So de su Deus chi nachi rispettas
Comente tue e sas cosas perfettas
Che tottu sas creaturas so sa sua

Duncas s’offesa chi nach’aches mie
L’aches galu e prusu a su Creatore
Suffrit a t’ideret irfruttatore
Pusti chi tottu cantu hat datu a tie

Dinco non rispettas sos fitzos suos
Prepotente ti piccas su potere
Tanno ti credes d’esseres su mere
Ischinne chi sun issos vrates tuos

Paret a bos isperdere detzisu
Bastes cumannet sa glaciazione
O vinas de tottu s’estinzione
Datu chi l’atzes offesu e derisu

Bos sarvat attrivitos su precare
Tanno precate in su mentras achite
Su vene pro tottu ca ja l’ischites
Est s’unicu modu de bos sarvare

Si sa risposta cheres a ti dare
T’accuntento pro chi potas tiddire
Dae Deus non ti potes ughire
'Inite 'e bos ucchier tottu a pare