Proite, proite sas paristorias
an' sempre su profumu
de rios e de montes,
de tancas e de mandras
e ojos mannos cantu sa notte?

B'aiat una 'olta unu mundu
chi pius no resesso ad agattare
ma remonidu restat in profundu,
cuadu in velos de ammentos:
Sa falditta niedda de minnanna,
sa sedattajola de mamma mia,
sa falche messadora de babbu meu,
sos ojos giaros e chietos
e s'ora de sa sera sonnigosa
accultzu a su foghile
a intender' contos de janas,
de vindittas, orcos e majalzas.

E puru sas nottes isteddadas
de s'istadiale profundu
cun sas cadreas in sa carrera,
sas burulas e-i sos risos,
sos giogos e sos contos
e mamma nostra chi a 'istentu
nos poniat a fortza in su lettu
cun sas cristas pienas de istellas
cando galu no b'aiat timorias,
ne maladias e nen dolores,
ancora cuntemplende sos fogos
alluttos in sos montes
cun sas umbras rujas
e sagumadas de calvonalzos.

B'aiat una 'olta unu mundu fuidu,
como chi ch'amus cunzadu
in una buscia de plastica
totas sas paristorias
mudadas in pedras.

Restat su risu ranchidu
chi su tempus nou nos regalat.

MENZIONE D'ONORE "PREMIO PIETRO CASU" BERCHIDDA