Bae amigu
di Antonio Maria Pinna

E tando ses abberu chi bi proas
a lassare s'amena joventura
pro ti fagher su nidu in cudd'altura
intéssidu cun filos de amore?
Bae amigu e mai su dolore
lamentosu ti ballet in sas coas!

Ma ti ballet su sole cun sa luna
su ballittu ch'intregat a su coro
pàsidas oras, e lugan che oro
sas dies de sa vida ch'atraessas,
e che massaju 'onu, cando messas
messes mannas doradas de fortuna.

Sa fortuna chi lessat sas istigas
in sos janniles de sa vida 'eninde,
chi beneigat sos fizos suinde
su latte caldu in sinu de sa mama,
e tue, a boghe calda che fiama,
ninnes e cantes cantones amigas!...

Bae in bon'ura, chi su tempus siet
un'andera de vida luminosa,
currinde a manu tenta cun s'isposa
in sas carrelas che sole passizes
e che babbu diciosu ti nd'abizes
ch'a sos chent'annos s'amore ti riet.

Bae, non timas: s' isposa t'adorat
e tue l'amas, l'amas e pro issa
t'imbenujas e faghes sa promissa
de l'amare che samben in sas venas.
Bae, non timas, non timas sas penas
chi su tempus intregat e isporat!

Bos unides e oe sizigliades
a manos juntas cun su juramentu
de bos amare contr'a d-ogni 'entu
e temporadas chi faghen minetta.
Bazi ca sa 'oghe 'e unu poeta
bos cantat cuss'amore chi ninnades!