Bae in bonora como,
chena frores e prantu,
carignos de piedade e ne d'amore,
pruere chi torrat a sa terra
de una fritta losa,
ranu 'e ispiga
ch'isettat un 'eranu
po poder acchimare.
Bae in bonora tando
chena ischire,
a inue as andare a ti pasare,
chena mancu t' 'asare,
solu,
in d'una notte 'e dolu,
niedda e chena ispera
e ne consolu.
Ma custu : "bae in bonora",
a chie est chi l'apo a dare,
si in custu iscuru mare,
sezis 'ama d'orfania,
ue donzi cumpanzia
est furistera;
solu,
fattu a bisera,
e unu biancu velu po decoro.
Narami chie ses, ite ti naras?
miro sos ogros e sas laras,
mudas, inserradas,
in su dolore 'e custu iscuru,
muru 'e disisperu chen' 'essida.
Da' sa vida bae in bonora,
frade isconsoladu,
a s'arcana dimora;
logu d'ermosura,
ue su dolu e s'amargura,
pius non sun presentes,
e po s'omine dolente
est solu incantu.
Bae in bonora
ma de cunfortu lassami su prantu.

___________

Fai buon viaggio

Vai e fai buon viaggio,
senza fiori ne pianto,
carezze di pietà o d'amore,
polvere che ritorna alla terra
di una fredda sepoltura,
grano di una spiga
che attende una primavera
per poter germogliare.
Fai buon viaggio
senza sapere
dov'è andrai a riposarti,
senza neanche un bacio,
solo,
in una notte di dolore,
nera, senza speranza
e ne conforto.
Ma questo: "Buon viaggio"
a chi lo dovrò dare,
se in questo scuro mare
siete un gregge d'orfani
dove ogni compagnia
è forestiera
solo
mal concio
ed un velo bianco che ti adorna.
Dimmi chi sei, come ti chiami?
guardo gli occhi e le labbra,
mute, chiuse
nel dolore di questo buio
muro di disperazione senza uscita.
Dalla vita fai buon viaggio
fratello senza conforto,
all'arcana dimora,
luogo di felicità,
dove la sofferenza e la tristezza
non sono più presenti,
e per "l'uomo del dolore"
è solo incanto.
Fai un buon viaggio
e per conforto lasciami almeno il pianto.

Prima classificata al concorso di poesia "Abbarra in domo tua" - Sedilo, 24 giugno 2020